Rødt Oslo

Raudts bystyrerepresentant Ingrid Baltzersen leverte dette forslaget til Oslo bystyre 19. november 2009. Det ser ut som om det vil bli behandla på bystyremøtet 3. februar 2010.

Det private forbruket i Norge er stadig aukande, det same er mengda søppel. Den økonomiske veksten nordmenn flest har opplevd dei siste åra gjer at det er blitt ganske vanleg å bytta ut fullt brukbare møbel, kjøkkenutstyr og elektroniske apparat for å friska opp eller for å få ein ny og meir avansert modell.

Samtidig har interessa for miljø og resirkulering også auka. Stadig fleire oppsøkjer bruktbutikkar og loppemarknader for å sjå etter ny sofa eller i håp om å gjera bokfunn. “Redesign” av brukte kler er ein populær trend.

Bruktbutikkane og loppemarknadene får inn ein god del av fullt brukbare saker folk ønskjer å kvitta seg med, men det blir dagleg kasta store mengder ting som framleis kunne hatt nytteverdi for andre. Ein del avfall blir kildesortert, men søppelkjørarar fortel at de ofte finn til dømes nesten ubrukte elektriske artiklar, som TV-ar og CD-spelarar.

Nord-Aurdal kommune har sett opp “byttekonteinarar” på miljøstasjonane sine. På Forus utanfor Stavanger har dei tilsette hos det interkommunale renovasjonsverket IVAR opna ei “byttebu” for at mykje fint og brukbart kan få eit nytt liv i andre sine hender heller enn å gå rett i søpla. Det same har REN sett opp på minigjenbruksstasjonen på Grefsen, men tilbodet er ikkje særleg godt kjent.

I Trondheim og Fredrikstad er det opna eigne “gratisbutikkar” kor folk kan komma og plukka med seg det dei har lyst på. Desse butikkane er drevet av frivillige og har opent berre nokre timar i veka.

I Tyskland har dei fleire stader ein fast dag der ting ein ikkje brukar blir sett på gata, og så kan andre komma og ta det dei vil ha.

Me bør oppmuntra til mest mogleg gjenbruk. Det er ein god måte å avgrense avfallsmengdene på og unngå at fullt brukbare og nyttige varer ender på søppeldyngja.

Forslag til vedtak:

1. Bystyret ber byrådet i løpet av første halvår 2010 fremje ei sak som utreier korleis Oslo kommune kan oppmuntra til og legga til rette for gratisbutikkar og byttebuer i Oslo.
2. Saka må mellom anna diskutera byttebuer eller byttekontainarar på gjenbruksstasjonar og miljøstasjonar, moglegheita for å stilla lokale til rådigheit for ein eller fleire gratisbutikkar i Oslo, og korleis ein kan oppmuntra burettslag til å laga eigne byttebuer eller liknande.